Ibiganiro byari biteganyijwe gutangira none kuwa mbere i Nairobi hagati ya leta ya Kinshasa n’imitwe y’inyeshyamba ‘byasubitswe’, nk’uko umwe mu bakozi bateguraga ibi biganiro muri Kenya yabitangaje.
Imyiteguro yasaga n’iyarangiye ariko “twatunguwe n’uko Kinshasa ubona ko nta bushake igaragaza bwo kuza”, nk’uko uyu mukozi utifuje gutangazwa yabibwiye BBC.
Ntihazwi neza igihe ibi biganiro, bisubitswe ku nshuro ya kabiri, byimuriwe, amakuru avuga ko ari mu cyumweru gitaha, ariko uyu mukozi avuga ko ari “ugutegereza tukareba”.
Byari biteganyijwe ko imitwe irenga 15 yitwaje intwaro mu burasirazuba bwa DR Congo ihagararirwa muri ibi biganiro.
Ibi biganiro byasabwe na Perezida Evariste Ndayishimiye, ubu ukuriye umuryango w’ibihugu bya Africa y’iburasirazuba (EAC).
Leta ya Kinshasa ivuga ko itazaganira n’umutwe wa M23 mu gihe udashyize intwaro hasi ukanava mu bice wigaruriye, ibyo uyu mutwe wakomeje kuvuga ko utazabikozwa.
Hagat iaho Perezida William Ruto wa Kenya yaraye ageze i Kinshasa, uyu munsi kuwa mbere aganira na mugenzi we Félix Tshisekedi ku kibazo cy’umutekano mu burasirazuba, nk’uko ibiro bya perezida wa Congo bibivuga.
Ibinyamakuru muri DR Congo bivuga ko Ruto ashaka kugerageza kumvisha mugenzi we Tshisekedi ko akwiye kuganira na M23.
Abakurikiranira ibintu hafi bavuga ko M23 ubu ari wo mutwe uteye impungenge zikomeye Kinshasa kuko umaze kwigarurira igice gifatika mu ntara ya Kivu ya Ruguru kandi usumbirije Goma, umujyi munini mu burasirazuba bwa DR Congo.
Indi mitwe yitwaje intwaro muri Congo nayo kenshi ivugwa mu bikorwa by’ubwicanyi, ubusahuzi, gusoresha, n’ibindi bibangamiye ituze rya rubanda mu myaka irenga 20 ishize.
Ibihugu bigize EAC byemeje itsinda ry’ingabo z’akarere zo guhangana n’imitwe y’inyeshyamba yose mu burasirazuba bwa DR Congo.
Ingabo za bimwe muri ibi bihugu zamaze kuhagera ariko umuhate wa politiki ni wo usa n’ushyizwe imbere kugeza ubu mu gukemura ikibazo cya M23 na leta.
Kuri uyu wa mbere imirwano hagati y’ingabo za leta na M23 yakomeje mu duce twa groupement ya Binza mu burengerazuba bwa territoire ya Rutshuru, nk’uko amakuru avayo abyemeza.
Imirwano ya M23 n’ingabo za leta imaze gutuma abarenga 300,000 bava mu byabo kuva mu kwezi kwa Kamena (6), nk’uko ishami ry’ubutabazi rya ONU ribivuga.
Imibereho y’abahunze bari mu nkambi z’impunzi ahatandukanye muri Kivu ya Ruguru yifashe nabi cyane, nk’uko imiryango itandukanye y’ubutabazi ibivuga.
Source: BBC
